سباح غارق بين و محشور بين الصخور في شاطيء النخيل الاسكندرية

محمد مات غرقان الله يرحمه !! بس المشكلة انه لحد دلوقتي و بقالهم يوم من امبارح جسمه محشور بين صخرتين ومش عارفين يطلعوه من بين الصخور! و ف أكتر من فرقة أنقاذ بيحاولوا يطلعوه من امبارح بس للأسف مش عارفين يطلعوه عشان زي ما هتشوفوا الموج عالي جدا ً.

أنا أعتقد انوا فيه حاجة زي الونش ممكن تدخل ف المياه و تشيل الصخرة اللي هو محشور تحتها ويقدروا يطلعوا محمد عشان يكرموه لمسواه الأخير ويدفن !! غالبا ً نفس الونش اللي حط الصخور دي ف المياه .

أنا مش عارف الحاجة دي ممكن نوصلها ازاي او نبلغ مين مسئول عشان يتحرك بس اعتقد قوة النشر ف وسائل التواصل الإجتماعي ممكن تعمل دا و توصلنا لحد يقدر يقوم بالمهمة دي !!

المكان: شط النخيل - 6 أكتوبر - الأسكندرية.

أدعوا لمحمد كتير أولا ُ بالرحمة - ثانيا ً أنهم يقدروا يطلعوه من بين الصخور.

تحديث 24-9 الساعة 2 م :

كلمت غرفة عمليات المحافظة .. و لحد ما كلمتهم معندهمش اي فكرة عن الحادثة من امبارح .. و في انتظار تحرك غرفة العمليات.

تحديث 24-9 الساعة 3 م :

تم التواصل مع أحد المسئولين ف المقاولين العرب: وهما ف انتظار تكليف من الحماية المدنية او اشعار من المحافظة مرفق بمحضر تفاصيل الوضع (الناس علي اتم استعداد للتعاون) لأرسال المعدة المناسبة.

تم التواصل مع كابتن فريق الغطس الخاص بالشط : هو عمل اللي يقدر عليه هو وفرقته و ميقدرش يعمل اكتر من اللي هو عمله.

وصف الوضع من خلال كابتن البحرية عشان اللي يقدر يفدنا نعمل ايه ! الصخور علي بعد 100 متر من الشاطئ و عمق المياه عند الصخور من 1.5 ل 2 متر.

و نيجي بقي للحماية المدنية: حاولوا يطلعوا محمد من تحت الصخور بالطرق التقليدية و معرفوش (الوضع محتاج معدة تشيل الصخرة) تبلغ المحافظة او الجهات المعنية انهم يبعتوا معدة تتعامل مع الموقف !! لأ ازاي !! حلهم الجوهري والعبقري انهم ينتظروا البحر لحد بكرة اما يهدا علي الساعة 4 لو 5 و يحاولوا محاولة تانية بالطرق التقليدية برضوا !!

تحديث 24-9 الساعة 3.50 م :

تم الأتصال بمحافظ الأسكندرية د. محمد سلطان

قالي بالحرف مدام القوات البحرية والحماية المدنية موجودين يبقي هما أدري هيتعملوا مع الوضع ازاي وهما عندهم المعدات اللازمة للتعامل مع المواقف اللي زي دي !!

تحديث 24-9 الساعة 8 م:

خلص تاني يوم علي التوالي و محمد لسة تحت الصخور و قوات الحماية المدنية والبحرية واقفين منتظرين البحر يهدا عشان يطلعوا محمد و محدش راضي يكلف نفسه اي مجهود من اي نوع ويستدعي اي ألة تشيل الصخرة عشان نطلع محمد من تحتها (المنطق بيقول ان الونش اللي حط الصخور دي ف البحر نقدر نجيبه يرفع واحدة بس منهم ونطلع محمد من تحتها) (بس الواقع الأليم اللي هو الحل اللي البحرية والحماية المدنية مستنينوا اننا نستني اما البحر يهدا). حسبي الله ونعم الوكيل !!

** خلينا مستنين البحر أما يحن علينا ويهدا **

اللي يقدر يساعد بحاجة يتصرف و اللي مايقدرش يدعيلوا ...

#أنقذوا_محمد_من_بين_الصخور !!

#شاطي_النخيل

#الأسكندرية