#أكيلة_أسكندرية
#البلدي_يوكل
أول مره اجرب #فرج_أبو_خالد كانت من سنتين تقريباً وعرفت ساعتها ان في مستوي تاني خالص في الكبدة الاسكندراني وموضوع انها تكون بلدي فارق اكتر من اللحمة كمان..
الرجل ده بيعمل شوية كبدة بتلو حاجة خيال علمي بجد انا مشوفتش كبدة طرية وبتدوب في البق بالشكل ده قبل كده بس طبعاً غالية جداً لأن البتلو اسعاره نار ومش موجود كمان بس لو هتاخد كبدة بتلو خدها طبق مش سندويتش عشان تتمزج بيها اكتر حقيقي ده أحلي طبق كبدة أكلتة في حياتي، في السندويتشات خليك في الكندوز بلدي برضو وسعره أقل.
جربت المرة دي سجق خلطة كان حلو بس الخلطة متحبشة زيادة بالنسبالي السجق الجريل السادة أحلي كتير.
الاختراع العظيم بقي سندوتش مخ بالزبدة والتوم والفلفل في عيش فينو بيدهن زبدة ويتحمص في الفرن بيطلع ساندويتش عالمي بمعني الكلمة.. واكلت عنده سندوتش ضرة ديه اللي بيبقي فيها لبن البقرة ظريفة جداً برضو وطعم التتبيلة باين فيها جداً.
أول مرة أجرب الممبار بس مكنش أحلي حاجة كان ناشف ولما سألني مكلتوش ليه قولتله اعتذر وشاله من الحساب.
جربت المره دي كمان طبق #حلويات مش الحلويات اللي هي الفشة والكلام ده لا حلويات زي اللي بتبقي في الرقبة كده دي مش أي حد يفهمها وانا مش فاهم هو بيجمعها ازاي بصراحة بس بالنسبالي كانت لا تصدق لأني بحبها جداً وأول مره اكلها طلب كده.
#خلاصة الموضوع المكان مختلف تماماً هتاكل شوية كبدة مكلتهمش في حياتك هتنسي اي كبدة اسكندراني اكلتها قبل كده ولو ليك في المخ جرب المخ ابو زبدة وادعيلي.
#الاسعار هو غالي طبعاً مقارنة ب أي حد تاني عشان بيشتغل كله بلدي وهتلاقوا المنيو في أخر الصور.
#العنوان أسكندرية - ٣٢ ش السيد محمد كريم في بحري جنب مسجد المرسي أبو العباس علي طول وبيشتغل من الساعة ٦ المغرب كده ودايماً بليل زحمة ولازم تلاقي مشاهير بتاكل هناك.
تقييم وتصوير: إسلام سلامة
#EgyptianFoodies
صفحة ايجيبشيان فوديز على الفيسبوك الصور بالكامل و كذلك الموضوع بالتعليقات على الصفحة
1 comment:
إلي الحاج فرج أبو خالد. ...تحياتي
Post a Comment