عنوان مطعم اسماك فرج سوق الطباخين بحري الاسكندرية و ماذا تأكل هناك و الأسعار

تحذير البوست ده مش للناس بتوع السي فود وايت صوص وباستا السي فود البوست ده لأكيلة السمك التقال.

 

بقالي سنتين تقريبا لما بحب ادب دبة سي فود في #اسكندرية من بتوع زمان اللي هو شوية سمك وجمبري بلدي بتتبيلة اسكندراني علي ابوه هو شخص واحد اللي بلجأله  #فرج بتاع سوق الطباخين القديم اللي في شرع فرنسا ..

واللي ميعرفش #سوق_الطباخين ده زمان من 30 سنة كده كان وجهة كل الأكيلة التقال في اسكندرية وكان مليان مطاعم اعتقد مش فاضل منهم غير فرج ..

فرج لغاية دلوقتي محافظين علي طريقة الطبخ القديمة والحباش زي مابيقولوا عليه أو التتبيلة عندنا.

 

تضرب هناك شوية جمبري مشوي محصلوش في التاريخ بجد مش بفهم إزاي طالعين بالحلاوة دي وخط البطارخ في الجمبرىاية ضارب فيها من الراس للديل.

نجم النجوم هناك بقي هو طاجن السي فود بجد حاجة خرافة بتختار فيه اللي أنت عايزه أنا باخده ببطارخ وجمبري وسبيط وكابوريا فعلا الصوص بتاعة يصطل من حلاوته تاخد منه وتحط عالرز مش هتصدق نفسك.

 

اخدت المره دي كمان سمكتين موسي بالزبدة والتوم حاجة مزيكة المزيكة وكان في كل سمكة بـطروخ محترم..  

جربت هناك قبل كده سمكة مشوية ملح كانت دولية برضو

 

فكك هناك من الشوربة لو هتاخد شوربة يبقي شوربة جمبري حمرا متخدش شوربة سي فود

 

الاسعار هو مش رخيص بس عشان بينقي حاجته بالواحده يعني طاولة الجمبري بتنقي واحده واحده فبياخد بسعر غالي والموضوع ده معروف عنه عند الاسكندرنية القدام بس عامة السمك مفيهوش رينج سعر يعني ممكن تضرب سمكة بوري وتقوم برنس دافع ٦٠ -٧٠ جنية وممكن تتسلطن وتضرب زي ما انا عملت جمبري وطاجن وتدفع كتير وعامة #المنيو في أخر الصور.

 

 

توصية اسأل هناك علي إسلام سليمان ابن صاحب المكان شاب لذيذ وجدع جدا وحبيبي وبيوجب معايا دايما مفيش مره ابعتله حد يقوله أنا من طرف إسلام سلامة الا ما يقوم معاه بالواجب.

 

العنوان 7 سوق الطباخين من شارع فرنسا .. من علي البحر هو تقريبا تاني شرع يمين بعد قدورة هو شارع ممنوع الدخول بس الناس بتدخل عادي.

 

تقييم وتصوير: إسلام سلامة

و البوست منقول عن صفحة ايجيبشيان فوديز على الفيسبوك 

 

#EgyptianFoodies page on Facebook 

صور من المطعم